Citizen Satisfaction Survey Report

Projekti i USAID për Planifikim dhe Qeverisje Vendore (PLGP) ka filluar një program për përmirësimin e cilësisë së shërbimeve publike në Bashkine Patos, i cili është një nga pjesët e mëdha të programit të tyre. Programi i përmirësimit të cilësisë së shërbimeve (QSIP) është një program që ndihmon Bashkinë Patos në të ecur në drejtim të një kulture me fokus më të madh tek shërbimet dhe qytetarët. Sondazhi me qytetarët është një nga instrumentat që u përdorën për pikat e kontrollit të cilësisë, si pjesë e QSIP. Për kryerjen e sondazhit u hartuan dy pyetësorë të veçantë të personalizuar për banorët e qytetit dhe ata të njësive administrative. Pyetësorët u bazuan në një format dhe metodologji të përcaktuar dhe rënë dakord paraprakisht me stafin përgjegjës të Bashkisë. Ato u hartuan në bashkëpunim me pjesëmarrësit në Seminarin për Kontrollin e Cilësisë dhe u konsultuan me drejtuesit e lartë të Bashkisë. Sondazhi ishte anonim dhe konfidencial dhe u zhvillua në formën e intervistimit direkt dhe rastësor. Për kryerjen e tij në qytet u angazhuan të rinjtë e shkollës së mesme "Zhani Ciko", të cilët u trajnuan nga ekspertët e PLGP mbi teknikat e intervistimit. Ndërsa në njësitë administrative u përfshinë vetë punonjësit e zyrave vendore. Intervistuesit u kujdesën që në sondazh të përfshiheshin të rinj, gra dhe burra të moshave dhe profesioneve të ndryshme, që të mos ishin punonjës të Bashkisë apo të afërm të tyre. Përmbledhja e rezultateve të sondazhit tregon se shumica e të intervistuarve të përfshirë në sondazh në qytet ishin të moshës nga 15-55 vjec, ndërkohë që femrat përbënin 47% të të ankëtarëve. Në pjesën e parë të pyetësorit, banorët u pyetën për cilësinë e shërbimeve publike, duke përfshirë shërbime si infrastruktura rrugore, pastrimi, gjelbërimi dhe uji/kanalizimet. Në pjesën e dytë, u kërkua mendimi për komunikimin nga ana e Bashkisë, duke përfshirë përgjigjjen me mirësjellje, orientimin i saktë dhe i duhur dhe dhënien e zgjidhjeve të problemeve. Në pjesën e tretë, kërkohet informacion për pjesëmarrjen qytetare në vendimarrje, duke përfshirë pyetje të tilla si a jeni në dijeni të takimeve dhe mbledhjeve të hapura që bën Bashkia dhe Këshilli Bashkiak. Në pjesën e katërt, u trajtuan detyrimet që qytetarët kanë ndaj Bashkisë, duke përfshirë pyetje të tilla si a janë në dijeni të taksave dhe tarifave vendore dhe a janë të kënaqur me nivelin e shërbimit të ofruar në raport me ato që paguajnë.