Umushinga Ushinzwe Guteza Imbere Gusoma, Kwandika no kubara

Kigali, Rwanda—Ku wa 18 Werurwe 2015, amashuri yose abanza afashwa na Leta yahawe imfashanyigisho zateguwe ku buryo hakoreshwa uburyo ziteza imbere ubushobozi mu gusoma, kwandika no kubara. Izo mfashanyigisho, ziteguwe n’Ikigo Gishinzwe Guteza Imbere Uburezi mu Rwanda (REB), kibitewemo inkunga n’Ikigo cy’Abanyamerika Gishinzwe Iterambere Mpuzamahanga (USAID), binyujijwe mu Mushinga Ugamije Guteza Imbere Gusoma, Kwandika no Kubara (L3), ushyirwa mu bikorwa n’Ikigo Gishinzwe Guteza Imbere Uburezi (EDC). Mu mwaka wa 2014, mu Gihugu hose, amashuri abanza afashwa na Leta yatangiye gukoresha imfashanyigisho zateguwe muri iyo gahunda mu mwaka wa mbere n’uwa kabiri. Imfashanyigisho zagenewe umwaka wa gatatu, zije mu rwego rwo gukomeza iyo gahunda zikaba zirimo igitabo kigenwe umwarimu, ibitabo bikubiyemo imyandiko isomerwa abanyeshuri by’ikinyarwanda n’icyongereza n’igitabo cy’umunyeshuri. Umwaka ushize ayo mashuri yahawe terefone n’indangururamajwi byo kunyuzaho amasomo atuma abanyeshuri bagira uruhare mu myigire. Iyi gahunda isaba ko n’ababyeyi bagira uruhare mu burezi no mu mwigire y’abana babo, bareba ko abana batahana ibitabo mu rugo kandi bakabyitaho. Ababyeyi bose barasabwa kwicarana n’abana babo, bakumva uko basoma nibura mu gihe nk’icy’iminota cumi n’itanu, bakabafasha kandi bakajya babashimira uburyo bafite umwete n’uburyo bagenda batera imbere mu gusoma. Nk’uko bigaragazwa n’Ikigo Gishinzwe Guteza Imbere Uburezi mu Rwanda, abana basomera ku ishuri no mu rugo bagira ubushobozi bwo gusoma bakanabikunda kurenza abasomera ku ishuri gusa. Umuyobozi wa USAID mu Rwanda, Bwana Peter Malnak yaragize ati: “Twashimishijwe cyane n’uburyo imfashanyigisho z’umushinga L3 mu mwaka ushize zagize umusaruro mwiza mu mwaka wa mbere n’uwa kabiri y’amashuri abanza. Dushishikajwe no guhera ku byagezweho muri iyo myaka kugira ngo n’imfashanyigisho zigenewe umwaka wa gatatu zizagire umusaruro utubutse; mu gufasha abanyeshuri kwiga bashishikaye no kugeza ku barimu n’ababyeyi ibikoresho bibafasha kugeza ku banyeshuri uburezi bufite ireme. Mu mwaka wa 2016, gahunda yo guteza imbere Gusoma, kwandika no kubara izageza izo mfashanyigisho ku banyeshuri bo mu mwaka wa kane w’amashuri abanza. Umushinga Ushinzwe Guteza Imbere Gusoma, Kwandika no kubara, uraharanira gushyira ingufu mu myigire n’imyigishirize, ku buryo abanyeshuri barangiza amashuri abanza bafite ubushobozi buhagije mu gusoma no kwandika.